Comercio
Dende a súa orixe, a vila de Melide é eminentemente comercial. Unha das
grandes vantaxes do noso concello é que o comercio está aberto todos os días
do ano, domingos incluídos.
Precisamente na xornada dominical é onde se concentran meirande número de
visitantes en Melide. Para todos aqueles que se acheguen o último día da
semana á nosa vila, poderán gozar non só dunha ampla oferta comercial, senón
tamén hostaleira. De feito, moitos aproveitan a xornada de lecer para quedar
a comer en Melide e degustar un dos pratos rei nalgunha das pulperías de
referencia. Así mesmo, tamén se pode tomar o aperitivo na zona dos viños
para despois desprazarse a algún dos numerosos restaurantes onde se serven
pratos de todo tipo.
No tocante ao mercadiño dominical, este céntrase principalmente na zona do
Cantón de San Roque, o cruce principal da vila e a rúa do Convento. Aquí
pódense atopar todo tipo de artigos do sector téxtil, zapatos e
complementos.
A oferta de produtos agrícolas céntrase no casco histórico melidán. Tanto a
rúa da Alfóndiga (xusto detrás da casa consistorial) coma a praza das Coles
convértense todos os domingos en punto de encontro de agricultores de Melide
e da bisbarra que ofrecen hortalizas, froitas, verduras, queixos e outro
tipo de produtos.
O último domingo de cada mes ten lugar a feira grande de gando, a segunda máis
importante de Galicia. Esta cita desenvólvese no recinto feiral de gando,
localizado ao carón do Palacio de Congresos e Exposicións de Melide.
Aparte destas citas semanais e mensuais, o Concello de Melide colabora na
posta en marcha de citas que amosan a calidade dos produtos e servizos
ofertados polo empresariado melidán. Estos son a feira de oportunidades
Mercamelide e a feira agroalimentaria Manxares. No primeiro caso, a
organización corre a cargo da agrupación Asetem-CCA Melide e, no segundo, do
Grupo de Desenvolvemento Rural Ulla Tambre Mandeo.
Asociacións de Comerciantes e de Hostaleiros
Asetem-CCA Melide
O amplo tecido empresarial de Melide está agrupado en asociacións. Así, os
comerciantes agrúpanse na Asociación de Empresarios da Terra de Melide
(Asetem-CCA Melide), actualmente presidida por Manuel Vázquez García.
Esta agrupación naceu o 30 de outubro de 1989 co fin de defender os intereses
do colectivo empresarial da vila. Un dos fitos históricos desta asociación
tivo lugar o 27 de maio de 2010, cando o antigo Centro Comercial Aberto Vila
de Melide, con preto de 50 membros, se integrou en Asetem para conformar a
actual Asetem-CCA Melide.
Dende entón o número de asociados non parou de medrar chegando ata máis de 150
asociados, entre os que se atopan todo tipo de estabelecementos comerciais,
hostaleiros, hospedaxes, así coma empresas de servizos.
Entre as numerosas actividades que se desenvolven dende a Asociación de
Empresarios da Terra de Melide, cómpre salientar a xa consolidada feira de
oportunidades Mercamelide, unha cita que conta coa
colaboración do Concello de Melide. Esta cita, na que se ofrecen produtos de
calidade a prezos reducidos, ten carácter bianual, desenvolvéndose
normalmente nos meses de febreiro e de xullo, coincidindo coas rebaixas de
tempada nos estabelecementos comerciais. As instalacións do Palacio de
Congresos e Exposicións de Melide acolle os arredor de medio cento de postos
que soen participar nesta iniciativa que conta con moi boa acollida entre o
público.
A maiores, dende Asetem-CCA Melide desenvólvense diversas campañas especiais
para animar as compras nos estabelecementos asociados. Entre elas atópanse
as campañas especiais de Nadal, nas que se sortean vales de compra entre
todos os clientes que mercasen nos comercios asociados.
Podes consultar máis detalles sobre Asetem-CCA Melide na súa web:
www.asetem.com.
Asociación de Hostalería Melide Móvese
O concello de Melide conta tamén cunha amplísima oferta de hostalería. Parte
dos profesionais deste sector no municipio están integrados na Asociación de
Hostalería Melide Móvese. Nela inclúense tanto bares coma restaurantes e os
estabelecementos da movida nocturna, principalmente concentrados na rúa
Galicia.
Esta asociación naceu co obxectivo de:
- Promover a hostalería de Melide
- Promocionar a imaxe do sector e dos asociados
- Propiciar o crecemento económico
- Impulsar as fins de semana
Entre as actividades desenvolvidas dende esta asociación atópanse diversos
eventos solidarios, coma a Gala benéfica do Combo Dominicano celebrada o
pasado mes de maio de 2015. Tamén se organizan con carácter periódico rutas
de pinchos polos bares e restaurantes da vila co fin de promocionar a
calidade da hostalaría melidán.
A Asociación de Hostalería Melide Móvese conta cunha páxina en Facebook á que
podes acceder neste enlace:
https://www.facebook.com/melidemovese/. Nela fanse eco de todas as
iniciativas desenvolvidas polos distintos locais hostaleiros da vila, así
como das iniciativas colectivas que organizan.