Concello de Melide

Novas

O Concello de Melide pon en marcha a campaña de recollida de xoguetes de Nadal

09/12/2019. O Concello, como cada ano por estas datas, pon en marcha unha campaña de recollida de xoguetes no nadal. Trátase dunha iniciativa que parte da Concellería Política Social e Igualdade e que se organiza ano tras ano no mes de decembro

MELIDE 9 de decembro de 2019.- O Concello de Melide, a través da súa concellería de Política Social e Igualdade pon en marcha ata o 2 de xaneiro de 2020 unha campaña de recollida de xoguetes de Nadal.

O lugar de recollida será no social de Melide e os xoguetes terán que estar en bo estado para poder ser entregados. Dende o Concello de Melide explican que “os xoguetes teñen que estar en boas condicións e ten que poder xogarse con eles, senon non ten sentido que llos entreguemos aos rapaces se non os van poder utilizar”.

A campaña, que durará ata o 2 de xaneiro, pretende recoller un gran número de xoguetes para entregar entre a poboación máis necesitada do concello. Trátase dunha campaña que se pon en marcha anualmente por estas datas baixo o lema “Para que todas as nenas e nenos teñan agasallos no Nadal”.

Finalizado o prazo de entrega, os servizos sociais do Concello de Melide repartirán os xoguetes recollidos nesta campaña entre as familias con menos recursos da vila. Deste xeito, todos os rapaces e rapazas poderán gozar dun agasallo nun día tan especial e esperado para eles como é o día dos Reis, no que a ilusión e a diversión debe ser o que predomine en todos os nenos e nenas.