- Novas
- Axenda
- Perfil de contratante
- Convocatorias
- Avisos e bandos
- Ordenanzas
- Melide en imaxes
- Facturación electrónica
- Pago provedores
Novas
Os rapaces do Colexio Mestre Pastor Barral coñecen a riqueza arquitectónica e cultural da Comarca co bus turístico
07/11/2017. A experiencia farase extensible aos tres colexios da vila para darlles a coñecer o amplo patrimonio melidán. Dúas técnicas de turismo do Concello de Melide adaptaron as súas explicacións aos máis cativos
O colexio Mestre Pastor Barral de Melide foi o encargado de inaugurar unha experiencia que dará a coñecer aos diferentes centros escolares da vila a riqueza arquitectónica e cultural a través de pequenas viaxes no bus turístico, que durante o verán percorreu os monumentos máis importantes do municipio e de concellos veciños.
Desta volta, tocoulle aos rapaces e rapazas de quinto e sexto de primaria do colexio Mestre Pastor Barral que se subiron ao bus turístico do Concello de Melide para coñecer seu patrimonio arquitectónico e cultural. As encargadas de achegar as explicacións ao grupo foron dúas técnicas de Turismo do Concello de Melide que contaron de xeito adaptado aos máis pequenos as claves do noso patrimonio.
A alcaldesa de Melide, Dalia García, explica que se trata dunha iniciativa conxunta posta en marcha polo Concello de Melide, dende a súa concellería de Cultura e Turismo e o colexio Mestre Pastor Barral. “Unha actividade que se fará extensible aos outros dous centros escolares que temos en Melide”, engade a rexedora.
García apunta que “é unha actividade para poñer en valor o noso patrimonio cultural e arquitectónico que se une á iniciativa que tan ben funcionou o pasado verán do bus turístico, así como outras que se poñen en marcha dende o noso Concello como pode ser a guía de Melide que recentemente acaba de ser publicada en xaponés, chinés e coreano. Traballamos para que visitantes e veciños coñezan todo o que Melide pode ofrecerlles, poñendo así en valor o noso patrimonio”.
![](control/imagenes/n20171108_1029401mz.jpeg)