Concello de Melide

Novas

A Xunta licita a redacción do proxecto para sanear o río Furelos

26/12/2018. Xunta de Galicia e Concello de Melide veñen de facer público que está o prazo aberto para que as empresas interesadas en realizar este traballo poidan presentar as súas ofertas ata o 15 de xaneiro. O importe é de case 53.000 euros

MELIDE 26 de decembro de 2018.- A Consellería de Infraestruturas e Mobilidade, a través de Augas de Galicia, vén de licitar a redacción do proxecto para resolver a acumulación de sedimentos na zona de baño da praia fluvial de Furelos, en Melide.

As empresas poderán presentar as súas ofertas ata o vindeiro 15 de xaneiro. Este contrato, licitado por un importe de preto de 53.000 euros, ten un prazo de execución duns 8 meses.

O obxectivo deste contrato é analizar as alternativas e redactar o proxecto construtivo das actuacións para resolver os problemas ocasionados pola modificación do réxime hidráulico que sofre o río Furelos, co fin de mellorar a súa conectividade na contorna da praia fluvial.

Na contorna deste río existe unha zona de baño habilitada na praia fluvial, que cun espazo de recreo. Na actualidade, o espazo reservado para o baño atópase colmatado por acumulación de sedimentos retidos no azud.

Para solucionar esta situación analizaranse diversas actuacións, entre elas a apertura de todo ou parte do azud co fin de dispor dunhas comportas que se abran no inverno e que permitan o fluxo dos sedimentos durante a época de máximas enchentes, e permanecendo cerrada na época estival para favorecer a zona de esparcemento público. Tamén se estudará a disposición de deflectores permanentes ou temporais, é dicir, dispositivos que modifican a dirección dunha corrente de fluído, co obxectivo de evitar a presenza de zonas mortas e contribuír ao fluxo dos sedimentos, recuperando ó réxime hidrolóxico do río.

Dalia García, a alcaldesa de Melide, agradece unha vez máis a implicación da Xunta de Galicia ante un problema que dende o organismo local sempre se lle intentou buscar a mellor solución, tendo en conta que se trata dunha área moi utilizada polos veciños e veciñas da vila durante os meses de verán.