Concello de Melide

Novas

Melide celebrará a II Liga de Fútbol Sala

15/02/2023. O Concello de Melide levará a cabo unha nova edición desta competición dun dos deportes máis emblemáticos por volume de afección no municipio. Os partidos disputaranse todos os mércores no polideportivo.

A Liga de Fútbol Sala de Melide regresa un ano máis nunha segunda edición que pon de manifesto tanto o arraigo desta modalidade deportiva no municipio como o éxito da I Liga. Un total de sete equipos de toda a área melidá competirán novamente en partidos que se celebrarán cada mércores, entre as 21h e as 23h, no pavillón polideportivo municipal.

O concelleiro de Deportes, José Prado, amosouse satisfeito por “acadarmos unha nova edición desta competición, o que demostra que existía e que existe, e medrando, interese entre a afección melidá por contar cun evento destas características”.

Un ano máis, a Liga de Fútbol Sala de Melide articúlase como unha actividade deportiva alicerzada nos valores da diversión e o desfrute, antes que pola competitividade. Novamente serán sete os equipos participantes chegados de todo Melide, nunha competición na que o ano pasado o equipo Pub Mytho se alzou como vencedor.

José Prado sinala que con esta nova edición da Liga o fútbol sala se consagra como un dos “eixes fundamentais” do deporte na localidade, á par de eventos como a Liga de Pádel, as andainas ou as Escolas Deportivas. “Novamente, máis de 70 persoas van ter a oportunidade de achegarse de novo a este deporte”, reivindicou.

A celebración dunha nova edición da Liga permite, igualmente, manter unha ocupación constante das instalacións deportivas municipais. “Nos últimos anos estamos a sacarlle moito partido ás instalacións deportivas con que contamos”, explica o edil. “A veciñanza sabe que ten ao seu dispor espazos para a práctica deportiva e, o máis importante, para socializar cos seus veciños e amigos, sempre co deporte como actividade e como valor”, rematou José Prado.