Concello de Melide

Novas

O Concello de Melide saca a licitación a reforma e posta en valor da Rúa San Pedro

14/05/2021. Trátase dunhas das rúas con maior valor histórico polo paso do Camiño de Santiago.

MELIDE 14 de maio de 2021.- O Concello de Melide aprobou na Xunta de Goberno Local celebrada no día de onte sacar a licitación a reforma e posta en valor da Rúa de San Pedro.

A reforma da rúa está incluída dentro das actuación previstas polo goberno local para mellorar a imaxe do casco histórico, acondicionando as principais rúas de tráfico de peóns coa supresión das barreiras arquitectónicas existentes.

O proxecto a realizar inclúe a construción dunha rede separativa de augas pluviais e residuais así como o soterramento do cableado de subministro eléctrico de iluminación e de telecomunicacións.

Na mesma liña, a pavimentación actual será substituida por lousas de pedra de granito, ao igual que as tapas de rexistro, co obxectivo de mellorar considerablemente a estética dando unha imaxe unitaria das principais rúas do casco histórico de Melide.

A reforma e posta en valor da Rúa San Pedro supón un investimento de 249.782,49€, financiados polo Plán único de Concellos da Deputación de A Coruña.